قصيدة شعبية مهداة لعيون أجمل وطن...بقلمي:-
***********************************
كَالو هالوطن بيه ضاكَت الآفاق
لم اغراضك.. أطلع..هالوطن عوفه
كَلت أطلع بسيطه وانسى هاي الكَاع
بس عندي شرط؟؟..كَلولي خنشوفه..!!
كَلت رايد وطن بيه حيدر الكرار
يرتاح اليجيه مهموم ويطوفه
وكَلت رايد وطن بيه الشهيد حسين
داخ الكون كلّه بقصة اطفوفه
وكَلت رايد وطن بيه كَبّة العباس
يطفح كرم رغم امكَطّعه اجفوفه
وكَلت رايد وطن بيه تلّة الحوراء
تصرخ هاا يجد بدموع مذروفه
وكَلت رايد وطن بيه مسلم المغدور
وكَبته بكل وقار اتزيّن الكوفه
وكَلت رايد وطن بيه موسى باب امراد
كل مهموم طبله انفرجت اظروفه
وكَلت رايد وطن بيه الجواد اتلوح
راياته اعلى كَبته بهيبة موصوفه
وكَلت رايد وطن بأحضانه سامراء
تعلّت باالايمه وغدت معروفه
وكَلت رايد وطن بيه انبياء الله
وبكل شبر منّه اسطورة مصفوفه
وكَلت رايد وطن خط اول المخطوط
وشمس مجده ابد مايوم مكسوفه
وكَلت رايد وطن عاصي على الاعداء
جبل ماهاب موته ولا خشى احتوفه
كَالولي تهده ولاتعد واتكَول
هذا الوطن بس بأحلامنه نشوفه
كَلت هذا العراق الاسس التأريخ
وكل مركب مجد يرسي على اجروفه
بعد ليعوفه المن يتجه ياناس
وجرح فركَاه ياجف تكَدر اتروفه
**********************
مع كل الود