علاء الدلوي 5:47pm Mar 13
مثل ما قررت تنساني الله وياك
الوياهم خنتني لازم يخونك
كالولك حلو لا تنغر انته بهاي
بس تخلص حلاتك ثق يذبونك
البنات البصدك بس بالشرف حلوات
... انهتك ستر بعد لظن يكلبونك
انه انطيتك امس روحي وحياتي انذور
ورخصت اني عمري لخاطر عيونك
وخذت كلبي ويه عقلي وصرت هايم بيك
وغركت انه بهواك وصرت مجنونك
افز فزت طفل لو مر علي طاريك
وفرح زفت عرس لمن يذكرونك
وضميتك كلب جوه الضلوع اصير
من عين البشر خايف يحسدونك
بقفص حبك عشت طير بجنك مكسور
ورضيت بذلتي متحمل سجونك
وامنتك عليه وكلت لا ميخون؟
كلت ابيض كلب لو الكمر لونك
وكلت غالي عليك وما تصير رخيص
ما ادري رخيص بسرعه يشرونك
الخنتني الخاطره صح ادري عنده فلوس
بس مو مثل كلبي المارضه بدونك
بعت نفسك اله ما حسبت للناس
مثل لثكة شرف كامو يشوفونك
باوع على روحك بالمرايا وشوف
وباوع لليحبك والي يغشونك
صدك تكتشف انته شكثر غلطان
وما تنفع لصبعك عضة سنونك
بعت العشره انته وفضلت الفلوس
بس بلا ثمن باجر يبيعونك
=============
الأربعاء مارس 14, 2012 3:41 am