Abo Al Hish 11:28pm Dec 28
اني اذا حبيت احبك من ضمير
روحي شمعه ليل تذبل من تحب
واذا اكرهك الله يستر من وراي
وضلت بكيفك تكمل تنسحب
اتريد تعشك راح تلاكي ملاك
وحضن دافي اوورد والوان وعشب
وانت اذا رايد لعب اهلن تعال
هاي سهله وهاي ما بيها تعب
العبك والعب على العبه والعلمك تلعب اعلمه علعب
تريدني اسهل سهل وياي صير
تريد تصعب راح تلكاني صعب
اتريد من عندي عشك انطي حنان
اتريد من عندي ذهب تنطي ذهب
اتريد من عندي وصل انطي وفاك
اتريد من عندي جذب تاخذ جذب
ولان واحد كلب واحد يبقه بي
اني ما عندي حبيبين بكلب
اني مثل النار تنطيها تزيد
منها تاخذ راح من يمك تشب
عيني اذا مابيك تمليها حنان
راح من اتروح لجلك ما تصب
وباب كلبي اذا متحني بديك
لو شلعت الباب ما تكدر تطب
تريد تكسرني صعب لين اصير
اتريد تعصرني تلاكيني صلب
ابكيفك اني شلون ما رايدني اصير
جاهز اني ومنتظر عند الطلب
الخشب نفسه تريد تصنع بي خراب
اتريد كرسي ملك تصنع بالخشب
اني طبعي ويه العشك نخله ويه كاع
اذا ماكو الماي ماتنطي رطب
وابد لا تستغرب الحب لو عذاب
هيه رحمه ولابسه هدوم الغضب
الحب جرح لمن نداوي نحتوي
والجرح لمن نهجره يلتهب
بالعشك كلشي اكو كلشي يصير
اكو بالغصبن اكو لا مو غصب
لتستغرب لجل التحبه تموت
بالعشك ماكو عجب بس العجب
ناس ماتت حته التحبه يعيش
وناس عاشت لجل التحبه يحب
بيوت عمرت بالعشك صارت قصور
وبالعشك نفسه الف بيت انخرب
اثنين يعني الحب اذا ثالث يفوت
حرف ثالث فات يتحول حرب
المثل ميضربونه اذا عاشك اسير
المثل مرات بالحب ينضرب
مو شكو حب يستمر يعني صحيح
ومو شكو حب ينتهي يعني نصب
اكو حب ينتهي بس ذكرى يعيش
واكو حب يستمر بس اسمه انشطب
سبب حبك اذا تلكاه لا تكول
احله حب لمن تحب بلا سبب
==================
الأربعاء ديسمبر 28, 2011 10:09 pm